Foto: The Little Deli se Cannalés van die winkel se Facebook-blad

Groot bederf by ʼn klein deli

Kobus Burger bestel by:

The Little Deli, Vierde Laan no. 47, Linden, Randburg, Johannesburg

Die oorlewingsdrang van soveel suksesvolle ondernemings is deur die wêreldwye Corona-pandemie na nuwe hoogtes gevoer. So moes die spyseniers Deli Express ook soos die feniks uit die as herrys.

Die gewilde verskaffer van eetgoed vir groot geleenthede en troues (al sedert 1998) het ʼn paar maande gelede ʼn winkel geopen waar allerhande lekkernye en varsgebak nou verkoop word.

Die bostelegraaf (en sosiale media) het my mettertyd na The Little Deli se glasdeure gelok. Met die verdwyning van die Chocolate Log van Suid-Afrikaanse winkelrakke het mense in my onmiddellike omgewing van ʼn nuwe verslawing begin vertel. Die verrukking van The Little Deli se Canalé (de Bordeaux) – ook gespel Cannalé.

Cannalés is ‘n Franse bederf wat onder meer bestaan uit vla, vanielje en rum wat in spesiale gietvorms (deur The Little Deli ingevoer) gebak word. Teen R20 elk is dit die allerfraaiste soetgoed om tydens ʼn spoggeleentheid voor te sit. As jy een aankoop maak, móét dit ʼn Cannalé wees!

Met ʼn opvolgbesoek was daar Tarte Tatin (die Franse se omgekeerde appeltertjies teen R20 elk) op die rak asook klein kaaskoekies en ander handtertjies (gewoonlik teen so R8 elk).

In die yskas was daar ʼn tuna-patee (teen R36) en ʼn nuwe patee van blou kaas (R34). In beide was daar te veel gelatien wat die patee té jellierig gemaak het. Die deli se kaasstokkies (in verskillende verpakkings) het aanloklik gelyk, maar was glad nie krakerig nie. Dalk was dit nie lugdig verpak nie, maar ook die souterige kaassmaak het my ontduik.

Hulle verkoop ook eiers, plaasbotter, gepreseveerde suurlemoen, kase (soos gegeurde Haloumi), salami en Scottish Eggs. In die vrieskas is daar ʼn verskeidenheid maaltye om tuis op te warm.

As jy ooit in die Randburg-omgewing is, is The Little Deli ʼn welverdiende besoek word. Sorg dat jy die huiswinkel met ʼn kartonboksie vol Cannalés verlaat, want dit is ʼn rare genot wat jy nie maklik in tuisnywerhede of koffiewinkels sal raakloop nie.

Italiaanse bederf in die buitelug by Chameleon Village se Ristorante Italiano.

Kuier- en eetplek vir gesinne

Kobus Burger eet by:

Ristorante Italiano, Chameleon Village, R104 (die ou Rustenburgpad op pad na Sun City), Damdoryn, Hartbeespoort (Noordwes)

As ʼn mens moeg word vir die lewe in die Goudstad, gaan soek jy vars lug. So beplan ek en Tamara ʼn daguitstappie na die Chameleon Village met sy Afrika-, vlyt- en boeremarkte en steek selfs die provinsiale grens sónder permit oor. Oeps!

Die Boeremark het naas vellies, spookasem en reukwater ʼn verskeidenheid tuisgebak, heuning en ingelegde produkte soos wortels wat in vinkel gepreserveer is. Die mark is in die buitelug, so daar is mense wat die maskers laat waai en peusel-peusel die ware bewonder.

Chameleon Village se Chinese restaurant – wat intussen sy deure gesluit het – was lank een van Tamara se gunstelinge. Daar is nou vier restaurante wat ʼn Portugese eetplek insluit. Van die winkeleienaars beveel egter die Italiaanse eetplek aan en dit is waar ons toe – neffens ʼn dammetjie met kabbelende water – in die opelug onder ʼn afdakkie gaan aansit.

Ons ontvang vinnige en flinke diens van die kelner Johannes wat spyskaarte en nie-alkoholiese bier (tussen R28 en R35) aandra. Johannes is vertroud met die spyskaart, maak aanbevelings en verduidelik wat besonder gewild is. Neffens die pizza en pasta is daar boereworsrolletjies, biefstuk, “Surf & Turf” en hoender.

Tamara bestel die Hawaiïese pizza (R98) en ek besluit op die gekrummelde hoender (Chicken Schnitzel teen R129) met slaai en skyfies. Johannes beveel die sampioen- pleks van kaassous aan. Kinders speel putt-putt in die tuine of op die klimrame. Daar is ook ʼn waterpark en area waar ʼn mens slange en reptiele kan besigtig.

Johannes hou ons op hoogte wanneer ons die kos kan verwag, asof hy die minute aftel … My hoendergereg bestaan uit twee groot stukke hoender, krakerige skyfies, ʼn goeie porsie slaai en die romerigste sous. Dikwels verwag ʼn mens dat die sampioensous uit ʼn pakkie kom, maar hierdie een was vars gemaak en verruklik. Komplimente aan die sjef!

Tamara was geïmponeer deur die dikte van die pizzadeeg – net reg – en het die groot pizza net daar tydsaam verorber! Gewoonlik word daar ʼn paar skywe in die woefkardoes gepak.

Ek moes wel ʼn wyle wag vir die slaaisous, maar ander ewe flukse kelners het kort-kort die vuil borde of leë bottels kom haal. Ons het lanklaas sukkel uitstekende diens ervaar.

Ristorante Italiano is die perfekte kuierplek vir gesinne wat vir smulkos –  en op ʼn veilige afstand van ander – wil aansit. Voeg daarby waarde-vir-geld-disse en die daguitstappie kry sommer ʼn onvergeetlike geurtjie by.

Die restaurant is van Dinsdae tot Sondae vanaf 08:00 tot 17:00 oop. Die Boeremark is nie ‘n vaste en daaglikse instelling nie.

 Kobus Burger het ten volle vir sy ete betaal.

Breek weg na ʼn padkafee-inryteater

Kobus Burger besoek:

Molly Malones Roadhouse, Hoek van Foreststraat en Sunset Boulevard, Pineslopes, Fourways, Johannesburg

Die grendelkoors het soveel mense gedwing om op vindingryke maniere verjaardagpartytjies te hou. Naas die verveling van Zoom-kuiers, is daar nou “verbyry”-byeenkomste of oprit-makieties met gelukspakkies wat vir elke motor en sy insittendes voorberei word.

In ons vriendekring was daar onlangs twee verjaardae en ons besluit toe om Molly Malones (ʼn Ierse kroeg oorkant die Montecasino-kompleks) se nuwe padkafee te beproef. Die “Roadhouse” is ook ʼn inryteater waar jy klassieke flieks soos Pretty Woman en Grease kan ervaar. Daar is springmielies (R20) en toffie-appels (R20) vir gesinsbederf en ʼn mens skakel op die klankbaan in deur Molly Malones se eie radiofrekwensie.

Vir die “veldfliek”-ervaring moet ʼn mens R50 betaal om ʼn parkeerplek te bespreek, maar dit word weer later van jou rekening afgetrek. Dus net ʼn besprekingsfooi.

Met ons aankoms was daar vriendelike parkeerwagte en flinke diens. ʼn Mens flikker jou hoofligte om iets te bestel, maar die son het nog geskyn. Met ʼn wuif van die hand kon ons telkens ʼn kelnerin se aandag trek. Hulle is net nie op rolskaatse nie!

Tussen die drie motors het ons Boerie Rolls (R63), hamburgers (R95 vir die hoenderburger) en die tradisionele vis-en-skyfies (R94) bestel. Die boereworsrol was sonder skyfies wat apart bestel moes word. Dit is wel ʼn reuse-porsie wat in ʼn kartonboksie bedien word. Die boerewors was geurig, maar die sjef was maar suinig met die gebraaide uie en sous.

Die vis-en-tjips was ʼn ruim porsie en volgens die een verjaardageter perfek.

Buiten die melkskommels was daar “koeldrank” wat enige volwassene se mond sal laat water. (Ons was op ʼn Saterdag daar en vol waardering vir drinkgoed wat skuim.)

Die inryteater is gewild en natuurlik die ideale gesinsvermaak. Ons was tussen twee fliekvertonings daar en kon dus sonder ʼn bespreking ʼn parkeerplek kry.

Molly Malones het ook ʼn oop stoep waar ʼn mens kan aansit, as jy nie agter jou stuurwiel of uit jou kattebak wil sit en eet nie.

Die spyskaart bevat ʼn goeie verskeidenheid disse en maak selfs voorsiening vir vegetariërs. Dit is dalk meer die aardigheid van ʼn padkafee (en opelug-fliek) wat soveel mense lok as die kos wat Molly Malones so gewild maak. O, en amper vergeet ek die koeldrank!

Gaan drink ʼn melkskommel of gee jou kakebene ʼn bietjie oefening met ʼn taai toffie-appel. Molly gaan jou met ope arms verwelkom.

  • Skakel 011 467 8052 vir besprekings.

Brood en soveel meer

Kobus Burger besoek:

Not Bread Alone, Malibongwerylaan no. 63, Linden, Randburg, Johannesburg

Vandeesweek bely ʼn kollega hoe sy haarself tydens die grendeltyd aan brood vergryp het. Sy noem dit trooskos, al is dit iets wat sy nie normaalweg eet nie.

Grendeltyd het wêreldwyd ʼn nuwe geslag bakkers tot stand laat kom. Op sosiale media is daar in volkleur met die baksels gepronk. Nie almal met dieselfde graad van sukses nie.

Die bakker Jimmy Hibbert het sy bakkery en eetplek Not Bread Alone al in 2006 op die grens van Linden – nie ver van die Cresta-winkelsentrum nie – tot stand gebring. Vóór die nasionale inperking was die plek al ʼn miernes vir beide wegneem- en aansit-klante.

Hibbert het sy onderneming geskoei op Matteus 4 vers 4: “Maar Hy antwoord: “Daar staan geskrywe: ʼn Mens leef nie net van brood nie, maar van elke woord wat uit die mond van God kom.” En vandag word dit gereken as een van die top10-bakkerye in die Goudstad.

Al kreun die rakke dus van ʼn verskeidenheid brode (wat met onder andere klipgemaalde (Stoneground) meel gebak is), is daar ligte etes, sop en fyngebak om van te kies en te keur.

In die deli-afdeling kan ʼn mens kaas, eiers, melk, koue vleise en ook van die bakker se meel aanskaf. Rondom ontbyt en later dan middagete is daar bekostigbare wegneem-maaltye – van gevulde croissants tot ʼn maalvleis-vetkoek. Die gegeurde maalvleis is met krakerige groenrissie opgekikker en die vetkoek is glad nie so olierig as wat ʼn mens sou verwag nie.

Van stapelvoedsel gepraat: een van die spesialis-afdelings is Not Bread Alone se pasteie wat pronk met vulsels soos bobotie, Kaaps-Maleise kerrie, geroosterde hoender, ribbetjies asook biefstuk-en-uie. Dit is haas onmoontlik om een uit te sonder. Teen R27,50 elk moet ʼn mens liefs ʼn verskeidenheid koop en so proe-proe deur die heilsame gebak eet.

Waar pasteie met geroosterde hoender dikwels met pasta, ʼn dik sous of selfs ʼn groentemengsel aangedik word, is hierdie pastei nét geroosterde hoender. Hibbert en sy span vat nie kortpaaie nie.

Ander gunstelinge is die dadel- of piesangbrood wat jou met ʼn liplekker-geurigheid gaan verras. Die dadelbrood sal maklik vir ʼn week lank in die broodblik vars bly, as jy nie al die eerste dag die helfte daarvan verorber het nie. Die snye smelt in die mond danksy die ruimskootse gebruik van dadels en pekaneute. ʼn Mens kan jouself wil flous dat jy slegs dadels en neute eet … ʼn Gesondheidsbroodjie?

Daar is rogbrode van allerhande groottes en style en dit vereis ook ʼn herbesoek of drie. Moenie verbaas wees as klante in sirkels deur die winkel dartel en kort-kort na die kasregister loop met nóg iets wat hulle wil saamneem nie.

Die sop, ontbyte en middagetes – vir wegneem – verskil van dag tot dag en is nie alslag op dieselfde tyd beskikbaar nie. Dieselfde geld die beskikbaarheid van die dadel- en piesangbrode. Bel eerder vooraf om te hoor wat beskikbaar is. Gryp maar net jou geduld, want hoe dit ook al sy: hier staan mense (soms lank buite die winkel) tou en met die eerste hap sal jy weet waarom.

  • Skakel 011 888 8764 vir bestellings of meer navrae oor Not Bread Alone se etes en varsgebak.

Plek van die Vleisvreters

 Kobus Burger eet by:

The Braai Room, Linden en Lonehill, Johannesburg via eie besteldiens vanuit Linden, Johannesburg

Kom ons noem dit maar die “Plek van die Vleisvreters”, ʼn veilige hawe vir iedereen wat neus optrek vir groente en slaai. Dit is die Johannesburgse voorstad Linden se The Braai Room (ook met ʼn tak in Lonehill) en deel van dieselfde familie as die spoggerige slaghuis Country Meat.

In einste restaurant het ek en vriende al aangesit vir shisa nyama (Zoeloe vir “koop en braai”) – ʼn vleisfees wat so oorweldigend was dat ons amper die helfte ingepak het vir huis toe neem. Hier is “shisa nyama” onder andere lamstjops, beesvleis, boerewors en ʼn halwe hoender met slaai, pap en sous.

Nou hang sommige van ons soos voëltjies in ʼn kou – hoog in woonstelblokke sonder ʼn tuin of braaigeriewe. The Braai Room is egter aan die brand met sy oop-vlam-braaiplek en eie besteldiens. En van daardie shisa nyama (R300 vir twee persone of halfprys vir een) tot lamskenkel, eisbein asook hoendervlerkies word gratis by jou voordeur afgelewer.

Die klassieke hamburger met skyfies (gewoonlik R95) is tans deel van ʼn spesiale aanbod en word vir R59,95 afgelewer. Die 180g-burger is net so geurig – indien nie veel beter nie – as Steer’s se klassieke hamburger. ʼn Pienksousie en dik skywe agurkie, tesame met die geurigste bief sorg vir ʼn vingerleklekker middagete. Die porsie skyfies is klein, so as jy lief is jou tjips bestel eerder ʼn ekstra porsie.

Beide Country Meat en Braai Room spog met ʼn plaas-tot-vurk-konsep (“farm to table”). Dié het ek ervaar toe ek onlangs ‘n biefstuk bestel het. Uiteraard bang dat die ete louwarm of koud by my sal opdaag… Wie druk nou ʼn vlamgebraaide koue biefstuk in die mikrogolf?

ʼn Filet (350 g) met skyfies (vir R110) was ook deel van die spesiale aanbiedinge en 20 minute later lui my selfoon. Die kos was keurig verpak en die biefstuk nog warm. Groot knoffelvlokke was bo-op gesprinkel en daarnaas die Argentynse chimichurri-sous (hoogstens ʼn eetlepel). Ek sou wel meer sous verkies het.

Die biefstuk was sappig en sag, soos die afleweraar my belowe het. Dit was effe rou in die middel, maar wel halfgaar buite-om soos ek versoek het. Die porsie was hopeloos te groot en ek het die volgende dag nog daaraan gepeusel. Waarde vir geld, beslis!

ʼn Mens kan ook ʼn hele hoender met tjips (vir R150) bestel en darem pap en sous (R24) of ʼn Griekse slaai (R84) insluit. Die huidige  (en kleiner) wegneemspyskaart bied egter niks vir die vegetariërs nie.

As jy nie naby Linden woon nie, maar jou wel eendag in hierdie geweste bevind, bel daardie nommer en verorber een van die sappigste hamburgs sommer net daar in jou motor. En sit dan The Braai Room op jou wenslysie vir ʼn volledige aansit aan die anderkant van grendeltyd.

  • Besoek www.braairoom.co.za; skakel 011 888 0201 vir bestellings of stuur ʼn WhatsApp na 083 397 3327 vir die spyskaart of weeklikse, spesiale aanbiedinge.
  • Kobus Burger het ten volle vir sy ete betaal.

die restaurant resenseer.

Bo: Meang Kum uit Thailand, geurige maalvleis met neute en groente wat in slaaiblare toegevou word. Onder: Dim Sum. Foto’s: Kobus Burger

Oosterse oase bied ʼn paletballet

Kobus Burger eet by:

Fusionista, Rabiestraat no. 14, Fontainebleau, Randburg, Johannesburg

Sommige mense reis deur na Instagram-kiekies te staar of deur tydskrifte te blaai en oor eksotiese bestemmings te droom. Met die Corona-paniek sal al hoe meer Suid-Afrikaners nou wil tuisbly en waarskynlik nie hul droomreise na die Ooste kan onderneem nie. Altans, nie binnekort nie.

In die Goudstad is daar wel ʼn plek waar ʼn mens met jou tong na verskeie lande kan reis. Fusionista is ʼn eksotiese, Oosterse oase wat geregte van Kambodja, Thailand, Japan, Laos, Viëtnam, China, Maleisië, Singapoer en die Fillippyne voorsit. En as die beurtkrag en verlepte verkeersligte jou in ʼn knop laat aansit, betaal jy R100 vir ʼn nekmassering aan tafel!

Een van die restaurant se mees unieke disse is die Prawn Chip-soesji, dus krakerige soesji wat nie op rys nie, maar die Chinese Prawn Crackers bedien word. Een porsie bevat beide gaar salm én tuna wat saam met chilli, sprietuie en ʼn tikkie mayonnaise bedien word. Gemmer en wasabi byderhand, teen R55.95 as voorgereg.

Ek en Tamara het dit gedeel en is dit eens dat dit een van die beste nuwe smaakervarings in ʼn lang tyd is. Tien uit tien aan die sjef. Eet net dadelik, anders raak die skyfieskulpie pap.

Ons was braaf en wou nie net een gereg geniet nie. Vandaar het ons die vleisballetjies met heuning en gemmer uit Kambodja bestel (R76.95). ʼn Porsie doeksagte dim sum het ook opgedaag en dan die meer tradisionele satay-stokkies met hoender en ʼn grondboontjie-doopsous (R68.95).

Om dit af te rond, was daar die Meang Kum uit Thailand (R82.95) – Thai-maalvleis met neute en vars groente wat jy self in krakerige slaaiblare toevou.

Die kelner plaas ook ʼn klein Lazy Susan in die middel van die tafel met bykomstighede soos heel chilli, chilli-vlokkies en nog neute om oor die kos te strooi.

Die bottel Franschhoek Cellar Chenin Blanc het R145.90 gekos en die disse tintelend aangevul.

Die hoenderrepies op die satay-stokkies was droog en krakerig, soos sommige mense dit dalk verkies, maar die enigste gereg wat nie heeltemal aan die verwagting voldoen het nie.

Elke tafel het ʼn gonser waarmee die kelners ontbied kan word. Die spyskaart is knuppeldik en sluit selfs “Asian Pizza” in. Die lys vir wyn en drinkgoed is ewe aanloklik.

Fusionista bied ook ʼn Taste Bud Tour of the East aan met tien geregte teen R450 per persoon – of deel teen halfprys. ʼn Teepot met saké (ryswyn) kan teen R50 bygevoeg word.

Toer met die tong is nou vir soveel van ons die voorland en Fusionista bied ʼn paletballet soos min. Moenie skroom om hier te gaan aansit nie.

  • Kobus Burger het ten volle vir sy ete betaal. Die bestuur en personeel was onbewus daarvan dat Burger die restaurant resenseer.

Bo: Matthew Sartori, hoofsjef van Wildflower, en Schalk Schoombie. Middel: ʼn  Spesiale bord aptytwekkers. Foto’s Schalk Schoombie

Wildvreemde wondersmake uit die bos

 Schalk Schoombie eet by:

Wildflower, vierde verdieping van The Treasury, Perth,Wes-Australië. 

ʼn Afskeidsmaal ná ʼn kuier van drie weke by familie in Perth, Australië moet iets heugliks wees. So besluit ek en sus Marietjie toe saam op ʼn restaurant wat die Masterchef-beoordelaar George Calombaris in die kostydskrif Delicious uitsonder in sy keur van top-eetplekke in die stad. Ons is baie gelukkig om ʼn bespreking vir ses te kry tydens die eerste sitting om sesuur, wanneer die son uitspattig oor die Carlton Ritz se ovaaltoring en die Swanriver sak.

Die lig is gedemp. Muurskilderye beeld bloekombome in ʼn onbegrensde landskap uit. ʼn Rangskikking van wildeblomme, proteas en geel kangaroopoot vier die wildernis. Bedagsame kelners glip ligvoets tussen swart tafels gedek met grys plekmatjies; ons hoor hulle besig Europese tale by omringende tafels. Ons petite kelnerin is van Italië.

Swaer Charl bestel ʼn bottel 2006 Franklin Estate Cabernet Sauvignon en mocktails (pomelo en pynappel) vir die dogters, Ons kry ʼn broccolini-slaai vir die tafel, breek die warm wattelsaadbrood, smeer dit dik met botter vol soutvlokkies.

Sjef Matthew Sartori verskyn geruisloos met ʼn spesiale bord aptytwekkers: kunstige canapes, ʼn delikate tertjie met eendlewerpatee, ʼn swart meringue met ʼn visskuimpie. Mense se oë rek van dié smaakbomme.

My voorgereg is Manjimup reënboogforel met kombu, gepiekelde prei, suurlemoenmirt en nasturtium. Die vis dartel in die mond. As hoofgereg bestel ek Margaret River Wagyu biefstuk met koningoester-sampioene, geroosterde warrigal-groente en soutbos. Die vleis is sensasioneel: sappig en sag, subtiel gegeur.

Ons proe by mekaar. Liza se jarrah-gerookte kangaroo met “greenlip abalone”, bloedlemmetjie en inheemse basieliekruidsous verbreed die smaaksin. Die droogverouderde Wagin eendbors met witwortel-bruinbotter, swart tee, dadel en ysplant is ʼn eksotiese kombinasie. Die Dorper lamsnek gebraai oor jarrah-hout met knoffel-emulsie, raap en peperbessie is ewe anders en smaaklik.

Ons eet stadig, verwonderd oor elke hap, wildvreemde geure uit die plaaslike bos wat vis, vleis en eend verhef tot elegante geregte.

Ek kies met opset ʼn nagereg wat nie belowend klink nie: Davidson Plum met bevrore kokosneutwater, “Geraldton wax” en jogurt. Wat ʼn kostelike openbaring! Dit lyk soos ʼn skepping uit Heston Blumenthal se laboratorium. Wat lyk soos ʼn hopie sneeuwit krummels transformeer in die mond tot laag-op-laag hemelse teksture en verleidelikheid. Ek delf al dieper tot by die soetsuur hart, die pruimjogurt. ʼn Ekstatiese klimaks vir ʼn volmaakte maal.

Sjef Matthew kom bederf ons verlaas met ʼn bord semisoet versnaperinge: ʼn veerligte “lemon myrtle delight”, okkerneuttruffels, donker sjokolade met lemoen en ʼn “strawberry gum stick”. Salig.

Tydens ʼn wandeling na die hawe omsoom met stadsliggies probeer ons woorde vind vir die vyfster-ervaring: Fantasties. Inspirerend. Sinsbegogelend. Die volgende vlak. Die hoogste rak.

Nou verstaan ek die Australiese passie vir fynproe.

Daar was niks oor om in wegneembakkies te pak nie. Foto: Uber Eats

 Heerlike Chinese wegspringfees

 Kobus Burger eet by:

Kakao, Winkel no. 24, Douglasdale-inkopiesentrum, h/v Leslie- en Douglasrylaan, Johannesburg (oorkant die KFC)

Dit is Chinese Nuwe Jaar – die begin van die Jaar van die Rot. Hoekom is die rot soms ʼn muis in die Chinese astrologie, wil ek by Tamara weet. Sy ken die Chinese astrologie en het aanbeveel dat ons rooi aantrek (of enige nuwe kledingstuk) en iets Chinees gaan eet.

Die verkeersknoop op ʼn Saterdag (!) op William Nicol-rylaan maak ons dors, maar Tamara verseker my dat haar keuse van ʼn restaurant vir ʼn Chinese viering vir alles sal vergoed.

Kakao is neffens ʼn sjokoladewinkel met ʼn gulhartige eienares wat ons dadelik ʼn voorspoedige nuwe jaar toewens. Ons bestel ʼn bottel Protea chenin blanc (R140) sodat ons darem “kung hei fat choi” (wense vir geluk en voorspoed in Kantonees) vir mekaar kan toewens.

Tamara het al op pad na die restaurant haar keuse van die spyskaart verduidelik. Ons gaan haar persoonlike gunstelinge deel.

Ek skuif dus die spyskaart eenkant toe en hoor hoe Tamara die rysnoedels met groente (R58), die Crispy Beef With Chili and Garlic Sauce ((R74) asook die Chicken with Pineapple (R64) bestel.

Die kelnerin verseker my dat die brandrissies in die biefgereg my nie in sweet sal laat uitslaan nie en dat die gereg eerder “soet” is.

Binne enkele minute dra die kelnerin die geregte aan en Tamara stel my op my gemak: “Daar sal genoeg oorbly dat ons albei wegneembakkies sal kan pak…”

Die rysnoedels met groente is verruklik met wortel, sampioene, bok choy en selfs groot repe bamboes. Dis nie olierig nie en geensins so vullend soos die dikker, gewone noedels wat ons op nabygeleë tafels sien nie.

Tamara reken die hoender-met-pynappel-gereg is té soet, maar ek het al soeter en swaarder gedokter met daardie alombekende MSG geëet. Die biefgereg is my gunsteling. Dit is ook soet met ʼn ligte byt, maar ek kon nie juis die knoffel of kwaai brandrissie proe nie. Dit het ʼn sojasous-basis en saam met die groentenoedels is dit ʼn gedugte kombinasie.

Ons het geskep, en weer geskep en later moes die kelnerin met drie leë borde wegstap. Daar was niks oor om in wegneembakkies te pak nie. Ons het die laaste paar druppels chenin blanc weggesluk en gewonder of ons nie een van die eendgeregte moes bestel het nie.

Volgende keer, het Tamara gou geantwoord en hardop gewonder oor hul soesji. Intussen is die een na die ander wegneemete opgepik, waarvan ʼn groot gros soesji was.

Die gehalte en prys van die disse gaan maak dat Kakao ons gou weer sien. Tamara lag. “Dit kon ek jou al voor die tyd gesê het…”

O, en die Chinese karakter vir “rot” kan netsowel na ʼn muis verwys, vandaar die verwarring. Voorspoedige Chinese Nuwe Jaar!

  • Kobus Burger het ten volle vir sy ete betaal. Die bestuur en personeel was onbewus daarvan dat Burger die restaurant resenseer.

Die jaar van botaniese bomme en giggelgras-gastronomie

deur Kobus Burger

Diegene wat in die kosbedryf se kristalbal kan tuur en die toekoms korrek voorspel, is óf besig om ʼn mediaverklaring af te rammel of goedsmoeds ʼn produk (of twee) te bemark. Pasop!

Tog, as ʼn mens lank op die werf deur die stof en blare moes soek na iets te ete, weet ʼn mens later wat die henne (en die paar hane) gaan uitpik. So lees ons toekomsvisie vir 2020 se eet- en drinkgewoontes met ʼn knippie sout.

Vleisvry

Die Yanks probeer nou hamburgers sonder vleis eet, en dit blyk dat hierdie “vleisvrye” eetgewoontes nou selfs in Suid-Afrika begin posvat. Verwag dus “plantgebaseerde” braaigenot. Of dié slap riem ons gaan flous, is ʼn gesprek vir ʼn ander dag. My ma fop al haar gaste vir dekades lank met ʼn kamma-kreefslaai en almal sweer hulle het sopas ʼn kreefkelkie geniet. Moeder lag lekker, want die duurste (en moeilikste) deel van haar “kreefslaai” was om die visgrate te verwyder. Voorwaarts fopkos!

Giggelgras

Tot in regeringskringe gons dit nou oor die moontlikhede van giggelgras – daardie krui wat soveel tieners by die vulstasie in ʼn banksakkie gaan koop. Ja, jy kry nou selfs die dagga in jou kos … en by feeste, markte en dergelike “groen” byeenkomste.

Verwag dat die “CBD infused”-etiket al hoe meer sal opduik. Van stokkielekkers tot poedings wat al groener sal smaak. In Suid-Afrika is daar dan selfs ʼn dagga-gegeurde bier wat glo nie jou kop sal laat draai nie. Die restaurant-spyskaarte het reeds begin groener raak, veral hier aan die nageregte se kant. Die dapper en vredevolle sjefs gaan ons nog verras, glo my!

Botaniese bomme

Die jenewer-gier voer tans hoogty in  Suid-Afrika en ons gaan hierdie drankie nog veel wyer proe as net in muskietgeteisterde gebiede. Daar is deesdae “botaniese bomme” wat jy in jou jenewer kan laat plons en selfs ʼn “gin fudge” – peperduur, maar die giervolgers is nie skaam om na hul beursies te gryp nie.

Daar is selfs ʼn rooibos-jenewer op die rakke en ʼn nisvervaardiger naby Kakamas. Die kokke gaan die drinkers se drinkgewoontes volg en die rooiwyn op die rak los. Ek wil nog bittergraag die jenewer-kaaskoek proe, so stuur gerus jou resep!

Daar is natuurlik gesondheidbeheptes wat ʼn alkoholvrye 2020 voorspel en luister ʼn mens so na die gissinge in regeringskringe is dit ʼn taai tameletjie wat jy nie met ʼn skerp mes uit die piering gelig gaan kry nie.

Laat jou kiestande jou lei en drink solank sommer weer iets op die nuwe jaar, of dit nou borrel, bruis of net na boorgat ruik. Tjeers!

.

Vinnige kaaskoek met net 3 bestanddele

1 liter (of een groot houer) joghurt van jou keuse

1 blik kondensmelk

1 pakkie Tennis-beskuitjies

Variasies: Daar is talle joghurt-geure, so kies iets eksoties soos bloubessie of pynappel. Tennis-beskuitjies het nou verskillende geure – van suurlemoen tot cappuccino. Eksperimenteer met een van die nuwe(r) geure. Aarbeie, bloubessies of gerasperde donkersjokolade kan na die tyd bo-op die kaaskoek gesit word vir bykomende geure. Wees kreatief.

Krummel die Tennis-beskuitjies met ’n koekroller of groot lepel en druk die krummels onder in ’n oondvaste bak vas. Die bak moet vooraf gesmeer word of met Spray ’n Cook gespuit word. Sommige kokke gebruik ’n bietjie botter saam met die krummels, maar die “kors” is ewe effektief sonder die botter of margarien. Meng die kondensmelk en joghurt goed saam. Gooi dan die mengsel bo-op die “kors” in die bak. Sit die bak vir 4 tot 5 minute in die mikrogolfoond en maak dit goed warm. Plaas die kaaskoek in die yskas om af te koel. Dit behoort reeds sowat 30 tot 45 minute later reg te wees vir opdien.

Hemelse nagereg: Davidson Plum met bevrore kokosneutwater, “Geraldton wax” en jogurt.

Birak – Season of the Young

Birak marks the hot and dry season, when the warm days are cooled by the afternoon sea breezes. An abundance of food sources still remain including mammals, birds, reptiles, and yonga (kangaroo). The start of the season sees the vibrant flowering of Nyutsia Floribuna, also known as the Western Australian Christmas Tree.

Uit Wildflower se spyskaart

Kekerertjiebredie

Tapas vir agt mense, vinnig en maklik.

1 eetlepel olyfolie

I groot ui, fyngekap

800 g geblikte, gekapte tamaties

4 groot knoffelhuisies, gekap

800 g geblikte kekerertjies, gedreineer

1 eetlepel soet paprika (rooirissie)

sout en peper

varsgebakte plaasbrood

Verhit die olie in ʼn groot kastrol oor matige hitte. Voeg die uie by, verminder die hitte tot laag en roerbraai vir 5 – 8 minute tot sag. Voeg die tamaties en knoffel by en prut vir 10 minute en roer nou en dan. Roer die kekerertjies en paprika by en bring tot kookpunt. Verminder hitte tot laag en prut, deels bedek, vir 15 minute tot die kekerertjies met ʼn dik sous bedek is. Sprinkel sout en peper na smaak by. Skep in ‘n opdienskottel en sit warm of teen kamertemperatuur voor met vars brood.

 150 Tapas Recipes, Inspired Ideas for Everyday Cooking, www.parragon.com/lovefood

 

Frik se skaapbredie

Frik de Jager van Benjamin’s, Rosendal deel sy resep. 

2 koppies gekapte pers uie
2 koppies bevrore soetmielies
2 koppies geblikte rooi stambone (kidney beans)
2 koppies gekapte rooi soetrissie
2 koppies gekapte baba murgpampoentjies

Neem ʼn medium skaapboud – met been – beknoffel dit goed (ten minste 20 knoffelhuisies). Druk ʼn takkie vars roosmaryn in elke knoffelgaatjie. Meng paprika, suurlemoensap en olyfolie, growwe sout en swartpeper saam tot ʼn paste en vryf die blad goed daarmee in. Verdun tomatiepuree met witwyn en voeg by blad in oondpan. Bak oornag stadig teen ʼn lae temperatuur (75°C), oornag vir minstena agt ure. Kerf blad op. Geur met ʼn knypie kaneel, komyn, paprika, ʼn teelepel e;l kakaopoeier en mosterdpoeier. Voeg die mengsel by die opgesnyde skaap en prut stadig in die sous vir sowat 20 minute. Braai in die afgeskepte vet saam met die uie, soetmielies, stambone, soetrissies, murgpampoentjies en speserye tot die groente sag is. Meng goed en bedien met couscous of wafels.

Frik de Jager

Wafels in die Oos-Vrystaat

deur Schalk Schoombie

Vyf vrae aan Frik de Jager, wafelkoning van Bemjamin’s in Rosendal.

Wie was Benjamin?

Die Benjamins was die enigste Joodse familie op Rosendal. Oubaas Benjamin het sy kleinhandelaar hier in die laat 1930s begin en dit het tot die 1970s bestaan. Hy het klere, skoene en gordels verkoop. Sy vrou se negosiewinkel was een blok op. Daar is mooi stories van sy vrygewigheid aan die boere in die depressiejare. Met Benjamin’s wou ek hulle nagedagtenis eer. Ek het ʼn seun en dogter van die Benjamins opgespoor en een Sondagmiddag het die nasate hier vergader. Ek is nou ʼn ere-Benjamin. Ek voel die oubaas se teenwoordigheid hier, en dis ‘n lekker een.

Wat het jou na Rosendal gelok?

Rosendal bied ʼn leefstyl en rustigheid wat min plekke in die land het. Die stilte, eenvoud en intense wisseling van die seisoene laat jou die natuur daagliks beleef. Die samewerking tussen die mense van Rosendal en Moatse is wonderlik. Hulle respekteer en kyk na mekaar.

Waarom wafels?

Anna Davel het gewonder hoekom nie een van haar foodie-vriende ʼn wafelplek het nie. Toe dink ek: Hoe kan ek wafels uniek en winsgewend maak? Ek wou soet vulsels afwissel met savoury, soos lamsbredie, bobotie, en ratatouille. Aanvanklik was soet en soutvulsels op wafels vir die locals  iets vreemds, tot hulle dit geproe het. Die wafels is maklik en vinnig, die vulsels is seisoenaal met vars bestanddele, en word vooraf gemaak. Die tannies wat kom kuier, wil iets koop, toe ek het op obskure plekke gaan soek na mooi goed soos eetware, kuns, dekor en snuisterye. Daar’s ‘n rak vol goeie tweedehandse boeke. Bring’n boek om te ruil of vir ‘n koppie koffie. Ons is sewe dae van die week oop, en oor naweke bied ek langtafels. Ek vertel kosstories van die resepte wat ek dwarsoor die land raakgekook het.

Twee donkies vir geselskap …

Dis Oscar en Basjan. Egte Botterbekke, bruin Spaanse donkies met wit pense. Almal speel met hulle, neem foto’s en voer hulle wortels. Mense stuur vir hulle geskenkies soos spesiale perdekoekies. Hulle het die handelsmerk van Benjamin’s geword en verskyn op bekers en ander produkte. Ek was my lewe lank gefassineer met donkies en wou altyd een hê. Hulle is vir my die mooiste goed. Toe ek sien daar word twee donkies op Rosendal se FB-blad geadverteer, het ek hulle dadelik aangeskaf.

In September en Oktober was jy in Griekeland.

Die kunstenaar Andries Gouws het ʼn slypskool in Molyvos op die eiland Lesbos aangebied. Ek is genooi om saam met Talking Table te kook en wou leer van Griekse kos. Hulle gebruik speserye so anders. Vryf paprika en olyfolie in die lamsboud. Sit ‘n heel appel in die bredie vir ʼn vrugtegeur, laat dit uitkook en gooi die stronk weg. Ek beplan beslis ʼn paar Griekse langtafels …

  • Benjamin’s, Hertzogstraat 292, Rosendal. Bel Frik by 084 666 6616 vir langtafels, funksies en troues.Wafels met vulsels kos R70 – R80.
Antieke beet

The common garden beet, or beta vulgaris, is a descendent of the wild sea beet, which is thought to have been cultivated in ancient Greece as early as 300 BC and presented as one of the wild offerings to Apollo in the temple of Delphi. It was the leaves, not the root, that were consumed. Aphrodite was said to eat beets to enhance her beauty, and Hippocrates made wound dressings with them. The Romans, who called the plant beta, were more interested in the root, using it as a laxative, to cure fever and as an aphrodisiac.

Beetroot burgers by Joanna Weinberg, Conde Nast Traveller, July/August 2019

New England Corn Chowder (Maklike wintersop)

5 snye spek

1 ui, gekap

2 aartappels, geskil en gesny

2 koppies water

1 teelepel sout

2 koppies vars of bevore mieliepitte (ontvries)

1 koppie melk

1 koppie ligte room

Witpeper na smaak

Braai die spek in ʼn sopkastrol tot bros. Verwyder spek en dreineer op papier. Braai uie in die spekvet tot sag en geel. Voeg aartappels, water en sout by, bedek en kook 5 minute. Voeg mielies by. (Indien verkies, verwerk een koppie mielies eers in voedselverwerker tot puree.)  Kook nog 5 minute of tot aartappels sag maar steeds ferm is. Voeg melk, room en witpeper by. Verhit die sop maar moenie kook nie. Bedien met gekrummelde spek oorgestrooi.

Famous New England Recipes, by Dolores Riccio, Colourpicture Publishers

Kerriehoendersosaties

3 – 4 ontbeende, vellose hoenderborsies

4 sagte, gedroogte appelkose

4 pruime sonder pit

4 houtstokkies

Kerriesous

4 eetlepels sonneblomolie

12 pêreluitjies, geskil maar heel gelaat

1 eetlepel matige kerriepoeier

1 eetlepel gladde appelkooskonfyt

1 eetlepel wit asyn

halwe koppie witwyn

sout na smaak

Die dag vooraf

Verhit die olie in ʼn braaipan en sauté die uie tot sag en liggies verkleur. Roer die kerriepoeier by. Voeg die appelkooskonfyt, asyn en wyn by en kook tot die mengsel stroperig raak. Laat afkoel en giet in ʼn nie-metaalagtige bak. Sny die hoender in happiegrootte stukkies en geur met sout. Sny die appelkose en pruime in die helfte. Voeg die hoender en vrugte by die kerriesous en roer deur. Bedek met kleefplastiek en laat oornag in die yskas marineer (of vir minstens 6 ure).

Op die braaidag

Hou 8 uie heel en sny die oorblywende 4 uie in stukke groot genoeg om aan die stokkies te ryg. Berei die sosaties voor deur stukke hoender, appelkose en pruime afwisselend aan die stokkies te ryg. Plaas die sosaties op ʼn rooster oor die kole. Die kerriesous brand vinnig, so hou ʼn ogie op hulle en draai gereeld. Borsel dikwels van die kerriesous. Braai vir presies 12 minute.

Le Braai, Braai with a bit of je ne sais quoi deur Kobus Botha, Struik Lifestyle, 2018

According to Alliya (Ferguson), the appeal of Persian cuisine boils down to a few delicious fundamentals. It’s aromatic rather than fiery, relying on saffron and the spice combination of cinnamon, cumin and cardamom – known in Farsi as advieh – to impart flavour. There’s also a constant interplay between sour and sweet, with ingredients such as barberries, sumac, dried limes and pomegranate molasses imbuing savoury dishes with a mellow, yet complex base of bittersweet and tart flavors. And fresh herbs – particularly parsley, coriander and fenugreek – enjoy a starring role in many dishes, where they’re treated like vegetables rather than mere taste enhancers. “I like to descrice Persian quisine as peasant food with a really sophisticated flavor profile,” she says.

From Persia with love by Annette Klinger, Taste, May 2019

Kofta – frikadelle met appelkoossous

Meng 450 g gemaalde lamsvleis met 2 klein preie wat goed afgespoel en gekap is, een teelepel rou rys, en twee eiers. Meng 1 eetlepel gekapte vars koljander, sout en peper na smaak daarby. Vorm balletjies so groot soos okkerneute. Plaas die frikadelle in ʼn groot pan met 350 ml hoenderaftreksel en laat 20 minute prut. Voeg water by indien nodig. Dreineer die frikadelle en laat afkoel. Rol die frikadelle in meel en smelt 25 g botter in ʼn groot, swaar braaipan. Wanneer die botter warm is, braai die frikadelle daarin vir 5 tot 6 minute tot mooi bruin.

Vir die  sous, week 175 g gedroogde appelkose in water en bedek vir 2 ure. Dreineer appelkose en plaas in voedselverwerker en purée. Voeg 10 gekapte knoffelhuisies, een teelepel gemaalde koljander en een eetlepel olyfolie by. Purée. Tydens die proses, giet 750 ml hoenderaftreksel stadig by. Sprinkel sout en peper na smaak by, giet in die pan en laat prut vir 5 minute terwyl jy die mengsel met ʼn houtspaan roer. Giet die sous oor die frikadelle en geniet.

Apricots on the Nile: A Memoir with Recipes by Colette Rossant, Washington Square Press, 2004

Kos argief

  • Bobaaskos: ʼn feit soos ʼn koei
  • ‘Vis & tjips met sout & asyn, asb!’
  • Dis nou ʼn wen-wen situasie!
  • Sit aan by Ouma se eetkamertafel
  • Disse aan die dak en outentieke disse
  • Betaamlike boude & blye burgers
Lees nou